Sunday, February 18, 2007

Gie fools their silks

For A' That and A' That
του Robert Burns (1759-1796)

Διαβάζουν οι John Ramage, Nancy Doherty, Bill Torrance, σε ηχογράφηση του 1985.
Ακούστε τους:

Get this widget | Track details | eSnips Social DNA

Is there for honest poverty
That hings his head, and a' that?
The coward slave, we pass him by;
We dare be poor for a' that!
For a' that, and a' that,
Our toils obscure, and a' that;
The rank is but the guinea stamp -
The man's the gowd for a' that!

What tho' on hamely fare we dine,
Wear hodden gray, and a' that?
Gie fools their silks, and knaves their wine -
A man's a man for a' that!
For a' that, and a' that,
Their tinsel show, and a' that,
The honest man, though e'er sae poor,
Is king o' men for a' that!

Ye see yon birkie ca'd a lord,
Wha struts, an' stares, an' a' that -
Tho' hundreds worship at his word,
He's but a coof for a' that;
For a' that, and a' that,
His riband, star, and a' that,
The man of independent mind,
He looks an' laughs at a' that.

A prince can mak a belted knight,
A marquis, duke, and a' that;
But an honest man's aboon his might -
Guid faith, he mauna fa' that!
For a' that, and a' that,
Their dignities, an' a' that,
The pith o' sense and pride o' worth,
Are higher rank than a' that.

Then let us pray that come it may -
As come it will for a' that, -
That sense and worth o'er a' the earth,
May bear the gree, an' a' that.
For a' that, and a' that,
It’s comin' yet for a' that,
That man to man, the warld o'er
Shall brithers be for a' that.

No comments: